الشرح

អ៊ុមមុលមុមីនីន ម៉ៃមូណះ رضي الله عنها បានរៀបរាប់ប្រាប់ពីរបៀបងូតទឹកសម្អាតកាយពីជូនុបរបស់ណាពី ﷺ ។ គាត់បានដាក់ទឹកឲ្យណាពី ﷺ ងូត និងបិទបាំងរាងកាយលោកដោយវាំងនន។ បន្ទាប់មក ណាពី ﷺ លោកងូតទឹកដោយអនុវត្តដូចខាងក្រោម៖ ទីមួយ៖ លោកចាក់ទឹកលើដៃរបស់លោក ហើយលាងដៃទាំងពីរមុនពេលដាក់ដៃចូលក្នុងធុងទឹក។ ទីពីរ៖ លោកចាក់ទឹកលើដៃឆ្វេងដោយប្រើដៃស្តាំ រួចលាងប្រដាប់ភេទរបស់លោកដើម្បីសម្អាតវាពីភាពកខ្វក់នៃជូនុបដែលប្រឡាក់។ ទីបី៖ លោកទះដៃទៅនឹងដី បន្ទាប់មកជូតវា រួចលាងវាដើម្បីកម្ចាត់ភាពកខ្វក់ចេញពីដៃ។ ទីបួន៖ លោកខ្ពុរមាត់ រួចខ្ជាក់ទឹកចេញមកវិញ ហើយស្រូបទឹកចូលច្រមុះ រួចញើសចេញមកវិញដើម្បីសម្អាតច្រមុះឲ្យស្អាត។ ទីប្រាំ៖ លោកលាងមុខ និងដៃទាំងពីររបស់លោក។ ទីប្រាំមួយ៖ លោកចាក់ទឹកលើក្បាលរបស់លោក។ ទីប្រាំពីរ៖ លោកចាក់ទឹកលើផ្នែកដែលនៅសេសសល់នៃរាងកាយរបស់លោក។ ទីប្រាំបី៖ លោកផ្លាស់ប្តូរទៅកន្លែងផ្សេងដើម្បីលាងជើង ដោយសារលោកមិនទាន់បានលាងជើងនៅឡើយ។ បន្ទាប់មក ម៉ៃមូណះបានយកក្រណាត់មួយផ្ទាំងមកឱ្យលោកជូតខ្លួន ប៉ុន្តែលោកមិនបានយកវាទេ ហើយលោកបានជូតទឹកចេញពីរាងកាយរបស់លោក និងគ្រលាស់វាចេញដោយដៃរបស់លោក ។