الشرح

ਅੱਲਾਹ ਦੇ ਨਬੀ ﷺ ਨੇ ਦੱਸਿਆ ਹੈ ਕਿ ਜਦੋਂ ਅੱਲਾਹ ਨੇ ਜੰਨਤ (ਸਵਰਗ) ਅਤੇ ਜਹੰਨਮ (ਨਰਕ) ਨੂੰ ਪੈਦਾ ਕੀਤਾ, ਤਾਂ ਜਿਬਰਾਈਲ (ਅ.) ਨੂੰ ਫਰਮਾਇਆ: ਜਾਓ ਅਤੇ ਜੰਨਤ ਨੂੰ ਵੇਖੋ। ਸੋ ਉਨ੍ਹਾਂ ਨੇ ਜੰਨਤ ਨੂੰ ਦੇਖਿਆ, ਵਾਪਸ ਆਏ। ਜਿਬਰਾਈਲ (ਅ.) ਨੇ ਕਿਹਾ: ਹੇ ਮੇਰੇ ਰੱਬ! ਤੇਰੀ ਇੱਜ਼ਤ ਦੀ ਸੁੰਹ, ਜੋ ਕੋਈ ਵੀ ਜੰਨਤ ਅਤੇ ਉਸ ਵਿੱਚ ਮਿਲਣ ਵਾਲੀਆਂ ਦਾਤਾਂ ਅਤੇ ਆਰਾਮਦਾਇਕ ਚੀਜ਼ਾਂ ਬਾਰੇ ਸੁਣੇਗਾ, ਉਹ ਜ਼ਰੂਰ ਹੀ ਇਸ ਵਿੱਚ ਦਾਖ਼ਲ ਹੋਣਾ ਚਾਹੇਗਾ ਅਤੇ ਉਸ ਨੂੰ ਹਾਸਲ ਕਰਨ ਲਈ ਅਮਲ ਕਰੇਗਾ। ਫੇਰ ਅੱਲਾਹ ਨੇ ਜੰਨਤ ਨੂੰ ਮੁਸ਼ਕਿਲਾਂ ਅਤੇ ਤਕਲੀਫਾਂ, ਭਾਵ ਹੁਕਮਾਂ ਦੀ ਪਾਬੰਦੀ ਅਤੇ ਮਨਾਹ ਕੀਤੀਆਂ ਚੀਜ਼ਾਂ ਤੋਂ ਦੂਰ ਰਹਿਣਾ ਆਦਿ, ਨਾਲ ਘੇਰ ਦਿੱਤਾ ਅਤੇ ਇਹ ਲਾਜ਼ਮੀ ਕਰ ਦਿੱਤਾ ਕਿ ਜੋ ਕੋਈ ਜੰਨਤ ਵਿੱਚ ਦਾਖਲ ਹੋਣ ਦੀ ਇੱਛਾ ਰੱਖਦਾ ਹੈ, ਉਸ ਨੂੰ ਇਨ੍ਹਾਂ ਮੁਸ਼ਕਿਲਾਂ ਨੂੰ ਸਹਿਣਾ ਹੋਵੇਗਾ। ਫੇਰ ਅੱਲਾਹ ਨੇ ਫਰਮਾਇਆ: ਹੇ ਜਿਬਰਾਈਲ! ਜਾਓ ਅਤੇ ਹੁਣ ਜੰਨਤ ਨੂੰ ਵੇਖੋ। ਸੋ ਜਿਬਰਾਈਲ (ਅ.) ਗਏ ਤੇ ਜੰਨਤ ਨੂੰ ਵੇਖਿਆ, ਅਤੇ ਵਾਪਸ ਆ ਕੇ ਆਖਿਆ: ਹੇ ਮੇਰੇ ਰੱਬ! ਤੇਰੀ ਇੱਜ਼ਤ ਦੀ ਸੁੰਹ, ਮੈਨੂੰ ਡਰ ਹੈ ਕਿ ਕੋਈ ਵੀ ਇਸ ਵਿੱਚ ਦਾਖਲ ਨਹੀਂ ਹੋ ਸਕੇਗਾ, ਕਿਉਂਕਿ ਇਸ ਤੱਕ ਪਹੁੰਚਣ ਦਾ ਰਾਸਤਾ ਤਕਲੀਫਾਂ ਅਤੇ ਮੁਸ਼ਕਿਲਾਂ ਨਾਲ ਭਰਿਆ ਹੋਇਆ ਹੈ। ਇਸੇ ਤਰ੍ਹਾਂ ਜਦੋਂ ਅੱਲਾਹ ਨੇ ਜਹੰਨਮ ਨੂੰ ਪੈਦਾ ਕੀਤਾ, ਤਾਂ ਜਿਬਰਾਈਲ ਨੂੰ ਫਰਮਾਇਆ: ਹੇ ਜਿਬਰਾਈਲ! ਜਾਓ ਅਤੇ ਜਹੰਨਮ ਨੂੰ ਵੇਖੋ। ਸੋ ਉਹ ਗਏ ਅਤੇ ਜਹੰਨਮ ਦਾ ਮੁਆਇਨਾ (ਜਾਂਚ) ਕੀਤਾ। ਅਤੇ ਫੇਰ ਵਾਪਸ ਆ ਕੇ ਕਿਹਾ ਕਿ: ਹੇ ਮੇਰੇ ਰੱਬ! ਤੇਰੀ ਇੱਜ਼ਤ ਦੀ ਸੁੰਹ, ਜਹੰਨਮ ਵਿੱਚ ਜੋ ਅਜ਼ਾਬ, ਤਕਲੀਫਾਂ ਅਤੇ ਸਖ਼ਤ ਸਜ਼ਾਵਾਂ ਹਨ, ਉਨ੍ਹਾਂ ਬਾਰੇਜੋ ਵੀ ਸੁਣੇਗਾ, ਉਹ ਇਸ ਵਿੱਚ ਜਾਣਾ ਨਾਪਸੰਦ ਕਰੇਗਾ ਅਤੇ ਇਸ ਵਿੱਚ ਲੈ ਜਾਣ ਵਾਲੇ ਸਾਧਨਾਂ ਤੋਂ ਵੀ ਦੂਰ ਰਹੇਗਾ। ਉਸ ਤੋਂ ਬਾਅਦ ਅੱਲਾਹ ਤਆਲਾ ਨੇ ਜਹੰਨਮ ਨੂੰ ਇੱਛਾਵਾਂ ਅਤੇ ਮਨਮੋਹਕ ਚੀਜ਼ਾਂ ਨਾਲ ਘੇਰ ਦਿੱਤਾ ਅਤੇ ਫਰਮਾਇਆ: ਹੇ ਜਿਬਰਾਈਲ! ਹੁਣ ਜਾਓ ਅਤੇ ਜਹੰਨਮ ਨੂੰ ਦੇਖੋ। ਸੋ ਜਿਬਰਾਈਲ ਗਏ ਅਤੇ ਦੇਖ ਕੇ ਵਾਪਸ ਆਏ ਤੇ ਆਖਿਆ ਕਿ: ਹੇ ਮੇਰੇ ਰੱਬ! ਤੇਰੀ ਇੱਜ਼ਤ ਦੀ ਸੁੰਹ, ਮੈਨੂੰ ਡਰ ਹੈ ਕਿ ਸ਼ਾਇਦ ਹੀ ਕੋਈ ਇਸ ਤੋਂ ਬਚ ਸਕੇ, ਕਿਉਂਕਿ ਇਸ ਦੇ ਆਲੇ-ਦੁਆਲੇ ਇੱਛਾਵਾਂ ਤੇ ਮਨਮੋਹਕ ਚੀਜ਼ਾਂ ਰੱਖ ਦਿੱਤੀਆਂ ਗਈਆਂ ਹਨ।